ആദ്യ ഭാഗത്തിലെ കഥാപാത്രങ്ങളും അവരുടെ സ്വഭാവരീതികളും നിലനിർത്തിക്കൊണ്ടുതന്നെ കൂടുതൽ സങ്കീർണ്ണവും എന്നാൽ രസകരവുമായ ഒരു പുതിയ കഥാപരിസരത്തിലേക്കാണ് ഈ ചിത്രം നമ്മെ കൊണ്ടുപോകുന്നത്. ആദ്യ ഭാഗം ഒരു ഫാമിലി ഡ്രാമ ആയിരുന്നെങ്കിൽ, ഈ രണ്ടാം ഭാഗം ഒരു ഡാർക്ക് ഹ്യൂമർ ഇൻവെസ്റ്റിഗേറ്റീവ് ത്രില്ലർ മൂഡിലാണ് ഒരുക്കിയിരിക്കുന്നത്.

കൃഷ്ണദാസ് മുരളിയുടെ തിരക്കഥ തന്നെയാണ് സിനിമയുടെ നട്ടെല്ല്. ഒട്ടും പ്രതീക്ഷിക്കാത്ത ട്വിസ്റ്റുകളും അവ അവതരിപ്പിച്ചിരിക്കുന്ന രീതിയുമെല്ലാം മികച്ചതാണ്. ഡോൺ വിൻസെന്റ് ഒരുക്കിയ സംഗീതവും പശ്ചാത്തല സംഗീതവും സിനിമയുടെ ത്രില്ലർ സ്വഭാവത്തിന് വളരെയധികം പിന്തുണ നൽകുന്നുണ്ട്. ആദ്യ ഭാഗത്തേക്കാൾ കൂടുതൽ കളർഫുൾ ആയ വിഷ്വൽസും വേഗതയേറിയ എഡിറ്റിംഗും സിനിമയെ ബോറടിപ്പിക്കാതെ മുന്നോട്ട് കൊണ്ടുപോകുന്നു.

'ന്നാ താൻ കേസ് കൊട്' എന്ന ചിത്രത്തിന് ശേഷം രതീഷ് ബാലകൃഷ്ണൻ പൊതുവാളുമായി ചേർന്ന ചാക്കോച്ചൻ, തികച്ചും വ്യത്യസ്തമായ ഒരു വേഷമാണ് ഇതിൽ ചെയ്തിരിക്കുന്നത്. നിസ്സഹായനായ, എന്നാൽ സാഹചര്യങ്ങൾക്കനുസരിച്ച് മാറുന്ന സേതുവായി അദ്ദേഹം മികച്ച പ്രകടനം കാഴ്ചവെച്ചു. കിടപ്പിലായ രോഗിയുടെ വേഷത്തിൽ ദിലീഷ് പോത്തൻ വിസ്മയിപ്പിക്കുന്നു. ശബ്ദത്തിലൂടെയും ചെറിയ ഭാവമാറ്റങ്ങളിലൂടെയും അദ്ദേഹം കഥാപാത്രത്തിന് ആഴം നൽകി. 'രോമാഞ്ചം', 'ആവേശം' എന്നീ സിനിമകളിലൂടെ ശ്രദ്ധേയനായ സജിൻ ഗോപു, തന്റെ തനതായ കോമഡി ശൈലി നിലനിർത്തിക്കൊണ്ടുതന്നെ ഗൗരവമുള്ളൊരു കഥാപാത്രത്തെ ഇതിൽ അവതരിപ്പിച്ചു.'മഞ്ഞുമ്മൽ ബോയ്സ്' സംവിധായകൻ ചിദംബരം ഒരു പ്രധാന വേഷത്തിലൂടെ അഭിനയരംഗത്തേക്ക് അരങ്ങേറ്റം കുറിച്ചിരിക്കുകയാണ്. 'അർമിയാസ്' എന്ന പോലീസ് വേഷം അദ്ദേഹം തന്മയത്വത്തോ.ടെ ചെയ്തു.

ആദ്യ പകുതിയിലെ മികച്ച കോമഡികളും സംഭാഷണങ്ങളും കുഞ്ചാക്കോ ബോബൻ - ദിലീഷ് പോത്തൻ കൂട്ടുകെട്ടിന്റെ പ്രകടനവും സിസ്റ്റത്തെ പരിഹസിക്കുന്ന രസകരമായ ആക്ഷേപഹാസ്യങ്ങളും ഈ സിനിമയുടെ പോസിറ്റീവ് ഘടകമായി വിലയിരുത്താം. എന്നാല്‍ സിനിമയുടെ അവസാന ഭാഗങ്ങൾ (Final Act) അല്പം സങ്കീർണ്ണവും വേഗത കുറഞ്ഞതുമായി തോന്നി. രണ്ടാം പകുതിയിലെ അമിതമായ പരീക്ഷണങ്ങൾ മൂലം കഥയുടെ ഒഴുക്കിന് ചിലയിടങ്ങളിൽ തടസ്സം നേരിട്ടു. ചില കഥാപാത്രങ്ങളുടെ ഡെവലപ്‌മെന്റ് പൂർണ്ണമായില്ല എന്നും തോന്നിപ്പിച്ചു. വ്യത്യസ്തമായ ഒരു മേക്കിംഗ് രീതിയും മികച്ച അഭിനയ മുഹൂർത്തങ്ങളും ഇഷ്ടപ്പെടുന്നവർക്ക് 'ഒരു ദുരൂഹ സാഹചര്യത്തിൽ' തീർച്ചയായും തിയേറ്ററിൽ ആസ്വദിക്കാവുന്ന ഒന്നാണ്. ക്ലൈമാക്സിലെ ചില അവ്യക്തതകൾ മാറ്റിനിർത്തിയാൽ ഈ വിഷുക്കാലത്ത് കുടുംബത്തോടൊപ്പം കാണാവുന്ന ഒരു ചിത്രമാണിത്.

- അസ്‌ലം സലാം

RELATED ARTICLES

ബാലി: ന്യൂ കപ്പിൾസ് യാത്രക്ക് കൊതിക്കുന്ന പറുദീസ.

അസർബൈജാന്റെ ഹൃദയത്തിലൂടെ ഒരു യാത്ര.

കണ്ടൽക്കാടുകളും കായലുകളും ചേർന്ന് തീർത്ത ഒരു ശാന്തസ്വപ്നഭൂമി