മാനന്തവാടിക്കടുത്തുള്ള തിരുനെല്ലിയിലെ ഒരു സർക്കാർ ആശുപത്രിയിൽ ജോലി ചെയ്യുന്ന 'സേതു' (കുഞ്ചാക്കോ ബോബൻ), കിടപ്പിലായ അയാളുടെ ജ്യേഷ്ഠൻ 'മധു' (ദിലീഷ് പോത്തൻ) എന്നിവരെ കേന്ദ്രീകരിച്ചാണ് കഥ വികസിക്കുന്നത്. മധുവിന് ഇടയ്ക്കിടെ ചില വിഭ്രാന്തികൾ (Hallucinations) ഉണ്ടാകാറുണ്ട്. ജ്യേഷ്ഠനെ സന്തോഷിപ്പിക്കാനായി സേതു ചില നാടകങ്ങൾ കാണിക്കാറുണ്ട്. ഈ ശാന്തമായ ജീവിതത്തിലേക്ക് മാവോയിസ്റ്റ് എന്ന് സംശയിക്കപ്പെടുന്ന ഒരു അപരിചിതൻ (സജിൻ ഗോപു) എത്തുന്നതോടെയാണ് കഥയിൽ 'ദുരൂഹത' ആരംഭിക്കുന്നത്.

രതീഷ് ബാലകൃഷ്ണൻ പൊതുവാളിന്റെ മുൻ ചിത്രങ്ങളായ 'ആൻഡ്രോയിഡ് കുഞ്ഞപ്പൻ', 'ന്നാ താൻ കേസ് കൊട്' എന്നിവയിലെ പോലെ തന്നെ ഇതിലും ഡാർക്ക് ഹ്യൂമർ ധാരാളമായുണ്ട്. എന്നാൽ രണ്ടാം പകുതിയിൽ അദ്ദേഹം നടത്തിയ പരീക്ഷണങ്ങൾ പ്രേക്ഷകരെ മിശ്രമായ പ്രതികരണങ്ങളിലേക്ക് എത്തിക്കുന്നു. അർജുൻ സേതുവിൻ്റെ ക്യാമറ വയനാടിന്റെ വന്യതയേക്കാൾ ഉപരിയായി ഇൻഡോർ സീനുകളിലെ നിഗൂഢതകൾ മനോഹരമായി പകർത്തിയിട്ടുണ്ട്. ഡോൺ വിൻസെന്റിന്റെ പശ്ചാത്തല സംഗീതം സിനിമയുടെ മൂഡിന് അനുയോജ്യമാണ്.

'ന്നാ താൻ കേസ് കൊട്' എന്ന ചിത്രത്തിന് ശേഷം രതീഷ് ബാലകൃഷ്ണൻ പൊതുവാളുമായി ചേർന്ന ചാക്കോച്ചൻ, തികച്ചും വ്യത്യസ്തമായ ഒരു വേഷമാണ് ഇതിൽ ചെയ്തിരിക്കുന്നത്. നിസ്സഹായനായ, എന്നാൽ സാഹചര്യങ്ങൾക്കനുസരിച്ച് മാറുന്ന സേതുവായി അദ്ദേഹം മികച്ച പ്രകടനം കാഴ്ചവെച്ചു. കിടപ്പിലായ രോഗിയുടെ വേഷത്തിൽ ദിലീഷ് പോത്തൻ വിസ്മയിപ്പിക്കുന്നു. ശബ്ദത്തിലൂടെയും ചെറിയ ഭാവമാറ്റങ്ങളിലൂടെയും അദ്ദേഹം കഥാപാത്രത്തിന് ആഴം നൽകി. 'രോമാഞ്ചം', 'ആവേശം' എന്നീ സിനിമകളിലൂടെ ശ്രദ്ധേയനായ സജിൻ ഗോപു, തന്റെ തനതായ കോമഡി ശൈലി നിലനിർത്തിക്കൊണ്ടുതന്നെ ഗൗരവമുള്ളൊരു കഥാപാത്രത്തെ ഇതിൽ അവതരിപ്പിച്ചു.'മഞ്ഞുമ്മൽ ബോയ്സ്' സംവിധായകൻ ചിദംബരം ഒരു പ്രധാന വേഷത്തിലൂടെ അഭിനയരംഗത്തേക്ക് അരങ്ങേറ്റം കുറിച്ചിരിക്കുകയാണ്. 'അർമിയാസ്' എന്ന പോലീസ് വേഷം അദ്ദേഹം തന്മയത്വത്തോ.ടെ ചെയ്തു.

ആദ്യ പകുതിയിലെ മികച്ച കോമഡികളും സംഭാഷണങ്ങളും കുഞ്ചാക്കോ ബോബൻ - ദിലീഷ് പോത്തൻ കൂട്ടുകെട്ടിന്റെ പ്രകടനവും സിസ്റ്റത്തെ പരിഹസിക്കുന്ന രസകരമായ ആക്ഷേപഹാസ്യങ്ങളും ഈ സിനിമയുടെ പോസിറ്റീവ് ഘടകമായി വിലയിരുത്താം. എന്നാല്‍ സിനിമയുടെ അവസാന ഭാഗങ്ങൾ (Final Act) അല്പം സങ്കീർണ്ണവും വേഗത കുറഞ്ഞതുമായി തോന്നി. രണ്ടാം പകുതിയിലെ അമിതമായ പരീക്ഷണങ്ങൾ മൂലം കഥയുടെ ഒഴുക്കിന് ചിലയിടങ്ങളിൽ തടസ്സം നേരിട്ടു. ചില കഥാപാത്രങ്ങളുടെ ഡെവലപ്‌മെന്റ് പൂർണ്ണമായില്ല എന്നും തോന്നിപ്പിച്ചു. വ്യത്യസ്തമായ ഒരു മേക്കിംഗ് രീതിയും മികച്ച അഭിനയ മുഹൂർത്തങ്ങളും ഇഷ്ടപ്പെടുന്നവർക്ക് 'ഒരു ദുരൂഹ സാഹചര്യത്തിൽ' തീർച്ചയായും തിയേറ്ററിൽ ആസ്വദിക്കാവുന്ന ഒന്നാണ്. ക്ലൈമാക്സിലെ ചില അവ്യക്തതകൾ മാറ്റിനിർത്തിയാൽ ഈ വിഷുക്കാലത്ത് കുടുംബത്തോടൊപ്പം കാണാവുന്ന ഒരു ചിത്രമാണിത്.

- അസ്‌ലം സലാം

RELATED ARTICLES

ബാലി: ന്യൂ കപ്പിൾസ് യാത്രക്ക് കൊതിക്കുന്ന പറുദീസ.

അസർബൈജാന്റെ ഹൃദയത്തിലൂടെ ഒരു യാത്ര.

കണ്ടൽക്കാടുകളും കായലുകളും ചേർന്ന് തീർത്ത ഒരു ശാന്തസ്വപ്നഭൂമി